Þú greiðir ekki fjármagnstekjuskatt fyrr en við sölu eigna í sjóði
Helsti munur þess að ávaxta fé á bankabók annars vegar eða í sjóði hins vegar felst í frestun á fjármagnstekjuskatti. Þeir sem ávaxta fé á bankabók greiða fjármagnstekjuskatt í hvert sinn sem vextir eru greiddir en aðilar sem fjárfesta í sjóði greiða einungis fjármagnstekjuskatt þegar viðkomandi selur sjóðinn, og þá eingöngu af þeim hagnaði sem fellur til við söluna.
Það þýðir um leið að ekki þarf að telja fram hækkun á gengi sjóðsins sem fjármagnstekjur, nema ef sjóðurinn er innleystur á árinu.
Hvaða sjóðir eru í boði?
Sjóðir Íslenskra verðbréfa eru starfræktir af Rekstrarfélagi verðbréfasjóða ÍV hf. Bæði er um að ræða hreina skuldabréfasjóði sem einungis fjárfesta í skuldabréfum með ábyrgð íslenska ríkisins (t.d. Áskriftarsjóður ríkisverðbréfa og Sparisafn ÍV) en einnig eignastýringarsjóði á borð við Eignastýringarsafn ÍV-I.
Alls eru 6 sjóðir í boði hjá Íslenskum verðbréfum, hægt er að nálgast upplýsingar um sjóðaúrvalið á yfirlitssíðu sjóða og greinargóðar upplýsingar um hvern og einn þeirra má sömuleiðis finna hér á heimasíðunni með því að smella á nafn viðkomandi sjóðs.
Hvernig fjárfesti ég í sjóðum Íslenskra verðbréfa?
Lágmarksfjárfesting er kr. 3.000 og hægt er að skrá sig í áskrift með því að hafa samband við Íslensk verðbréf í síma 460 4700 eða á heimasíðu okkar. Einfaldast er að hafa samband við ráðgjafa okkar, sem munu um leið ráðleggja þér hvaða sjóður hentar að teknu tilliti til þinna þarfa.
Einnig er hægt að fjárfesta í gegnum heimasíðu Íslenskra verðbréfa með því að smella hér.
50% afsláttur af söluþóknun sjóða fram til 31. desember
Fram til 31. desember verður veittur 50% afsláttur af söluþóknun sjóða, en söluþóknun nemur á bilinu 0 til 1% eftir því um hvaða sjóð er verið að ræða. Enginn kostnaður fellur til við sölu sjóðsins.
Nánari upplýsingar
Ráðgjafar Íslenskra verðbréfa veita nánari upplýsingar í síma 460 4700 og einnig er hægt að senda fyrirspurn á netfangið iv@iv.is. Þér er velkomið að heimsækja okkur að Sigtúni 42, 105 Reykjavík eða að Strandgötu 3, 600 Akureyri. Við tökum vel á móti þér.
Spurt og svarað um sjóði:
Hvað er sjóður?
Sjóður er safn fjármálagerninga (skuldabréfa, hlutabréfa, innlána o.þ.h.) sem sett eru saman í samræmi við skilgreinda fjárfestingarstefnu viðkomandi sjóðs. Fjárfestingarstefna sjóðs segir til um hvaða fjármálagerningar megi mynda sjóðinn og í hvaða hlutföllum.
Skipta má sjóðum í þrjá flokka, verðbréfasjóði, fjárfestingarsjóði og fagfjárfestasjóði. Einungis skilgreindum fagfjárfestum er heimilt að fjárfesta í fagfjárfestasjóðum en engar takmarkanir eru á því hverjum er heimilt að fjárfesta í verðbréfa- og fjárfestingarsjóðum. Um sjóði gilda lög nr. 128/2011 og er markmið laganna m.a. að tryggja skilvirka neytendavernd. Í lögunum er fjárfestingum sjóða settar ákveðnar skorður og jafnframt eru gerðar kröfur sem rekstraraðilar sjóða þurfa að uppfylla.
Við fjárfestingu í sjóði eignast viðskiptavinur hlutdeildarskírteini sem er ávísun á hlutdeild hans í eignasafni viðkomandi sjóðs. Viðskiptavinur getur síðan innleyst (selt) hlutdeildarskírteinið í samræmi við reglur viðkomandi sjóðs. Verð hlutdeildarskírteina ræðst af virði eignasafns sjóðsins á hverjum tíma.
Hver er binditími sjóða?
Binditími sjóða, þ.e. sá tími sem það tekur fyrir viðskiptavin að selja eign sína i sjóðum, getur verið mismunandi og fer eftir reglum hvers og eins sjóðs. Í flestum tilfellum tekur innlausn einn virkan dag og fær þá viðskiptavinur greiðslu fyrir innleyst hlutdeildarskírteini næsta virka dag eftir að hann óskar eftir sölu.Í sumum tilfellum getur innlausn tekið tvo eða þrjá daga.
Hvað gerist ef rekstrarfélag sjóðanna verður gjaldþrota?
Fjárhagur sjóða er algjörlega sjálfstæður frá fjárhag rekstrarfélags. Möguleg fjárhagsvandræði rekstrarfélags hafa því engin áhrif á eignir sjóða. Aftur á móti gæti reynst nauðsynlegt að leysa upp sjóði verði rekstrarfélag þeirra gjaldþrota eða að leita eftir því að annað rekstrarfélag taki yfir rekstur þeirra.
Eru einhverjar takmarkanir á því sem sjóðir mega fjárfesta í?
Fjárfestingar sjóða takmarkast annars vegar af fjárfestingarstefnu viðkomandi sjóðs, þar sem tilgreint er í hvaða eignum sjóði er heimilt að fjárfesta og í hvaða hlutföllum, og af lögum hins vegar. Í lögum nr. 128/2011 um verðbréfasjóði, fjárfestingarsjóði og fagfjárfestasjóði er tilgreint í hvaða eignum mismunandi sjóðaformum er heimilt að fjárfesta og með hvaða skilyrðum. Fjárfestingarstefna getur sett sjóði þrengri skorður en gert er í lögum.
Kostnaður við fjárfestingu í sjóði?
Fjárfestingu í sjóðum fylgir kostnaður sem skipta má í tvennt.
Söluþóknun greiðist þegar viðskiptavinur fjárfestir í sjóði og kemur þóknunin fram í mismun á kaup- og innlausnargengi. Söluþóknun fer eftir reglum viðkomandi sjóðs. Algengast er að upphæð söluþóknunar sé á bilinu 0,5-2,0%. Þó eru einnig dæmi um að engin söluþóknun sé tengd fjárfestingu í sjóðum eins og t.d. á við um Skammtímasjóð ÍV.
Umsýsluþóknun er gjald sem sjóðurinn greiðir til rekstrarfélags til að standa undir kostnaði við rekstur sjóðsins. Umsýsluþóknun fer samkvæmt reglum viðkomandi sjóðs. Algengast er að umsýsluþóknun sé á bilinu 0,5-1,5% á ári. Tekið er tillit til umsýsluþóknunar við daglegan gengisútreikning og þar með útreikning á ávöxtun sjóða, eigendur hlutdeildarskírteina eru því ekki rukkaðir sérstaklega um þessa þóknun.
