Innlend skuldabréf
Löng
verðtryggð skuldabréf hækkuðu um 0,74% í vikunni og stutt verðtryggð bréf hækkuðu
um 0,58%. Löng óverðtryggð bréf hækkuðu um 0,41%.
Eftirspurn
eftir ríkistryggðum bréfum helst stöðug og þau hækka vel í hverri viku. Enn og
aftur eru það fáir valkostir fyrir fjárfesta sem ýta undir þessa eftirspurn. Á
föstudaginn var útboð í nýjum ríkisvíxlaflokki með gjalddaga í október.
Mikil eftirspurn var eftir víxlunum og tók Lánasýslan tilboðum fyrir 20 milljarða. Flatir vextir bréfanna voru 5,95% sem eru töluvert háir vextir sé tekið mið af því að ávöxtunarkrafa ríkisbréfa með lokagjalddaga í desember er um 4,2%.
Í nýjustu markaðsfréttum Lánasýslu ríkisins má sjá að erlendir fjárfestar eru stærstu eigendur ríkisvíxla og ríkisbréfa. Í lok apríl eiga þeir um 70% af útgefnum ríkisvíxlum og rúmlega 70% af styttri ríkisbréfunum. Þeir eiga hins vegar aðeins um 10-20% af lengstu ríkisbréfunum. Lífeyrissjóðirnir eiga mest af lengstu flokkunum tveimur, eða um 40%.
Innlend hlutabréf
OMXI6ISK vísitalan stóð nánast í stað á milli vikna. Veltan var um 270 milljónir króna, mest með Marel fyrir um 137 milljónir. Marel hækkaði mest í vikunni um 5,9%. Tvö félög stóðu í stað en þrjú lækkuðu.
OMX Iceland 6 vísitalan er endurskoðuð á 6 mánaða fresti og ein breyting verður á vísitölunni þann 1. júlí n.k. þegar Eik Banki kemur inn fyrir Atlantic Airways. Vísitalan er samsett af þeim 6 félögum sem mest viðskipti eru með á Nasdaq Omx Iceland.
| Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
| BNORDIK | 150,00 |
-1,32% | -4,46% | -5,06% | 13,64% | 15,83% | 21,95% |
| FO-AIR | 128,00 | 0,00% | 0,79% | -3,76% | -12,93% | -9,22% | -21,95% |
| FO-ATLA | 154,00 | -3,75% | -4,64% | -6,67% | -7,23% | -3,75% | -53,31% |
| ICEAIR | 3,10 | 0,00% | 0,00% | 3,33% | -15,07% | -15,07% | -31,11% |
| MARL | 84,50 | 5,89% | -1,63% | 19,18% | 33,07% | 35,42% | 59,43% |
| OSSR | 183,50 | -2,39% | -1,61% | 2,80% | 32,01% | 18,77% | 65,32% |
| OMXI6ISK | 903,39 | -0,13% | -3,63% | -0,58% | 13,62% | 10,85% | 22,84% |
(Nasdaq OMX Nordic, 14. júní 2010)
Erlend hlutabréf
Góður gangur var á hlutabréfum almennt um allan heim í síðustu viku og hækkaði heimsvísitalan um 1,97%. Sum svæði hækkuðu meira en önnur og t.d. hækkaði samnorræna vísitalan um 2,82%.
Forsætisráðherra
Japans, Naoto Kan, segir að hætta sé á hruni þar í landi vegna gríðarlegrar
skuldsetningar hins opinbera. Skuldir Japans eru nú um 200% af
landsframleiðslu.
Kan líkti ástandi Japans við Grikkland og ef ríkin héldu áframhaldandi skuldasöfnun gæti það leitt til hruns og minnkandi trausts á ríkisbréfum landanna. Þessi ummæli forsætisráðherrans höfðu ekki áhrif á gengi jensins.
Greiningaraðilar
BCA eru bjartsýnir á hlutabréfin. Þeir telja að hlutabréf séu ennþá ódýr sé
horft til síðustu 30 ára. Þeir benda einnig á að vextir eru lágir sem koma
fyrirtækjunum til góða og ýta jafnframt á fjárfesta að skoða aðra valkosti en
innlán.
| Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
| Heimsvísitala (MSCI) | 1075 | 1,97% | -3,84% | -8,99% | -7,23% | -7,51% | 8,68% |
| Þýskaland (DAX) | 6048 | 1,84% | 1,16% | 3,06% | 5,59% | 2,84% | 20,86% |
| Bretland (FTSE) | 5164 | 0,75% | -1,14% | -7,52% | -2,12% | -3,88% | 17,13% |
| Frakkland (CAC) | 3556 | 2,99% | 1,36% | -8,11% | -5,78% | -8,32% | 8,50% |
| Bandaríkin (Dow Jones) | 10211 | 2,90% | -3,85% | -3,89% | -2,76% | -2,08% | 16,04% |
| Bandaríkin (Nasdaq) | 1847 | 0,83% | -3,14% | -4,02% | 2,10% | -0,71% | 23,97% |
| Bandaríkin (S&P 500) | 1092 | 2,57% | -3,88% | -5,08% | -2,02% | -2,11% | 15,37% |
| Japan (Nikkei) | 9705 | -1,98% | -5,57% | -8,11% | -2,23% | -6,32% | -2,53% |
| Samnorræn (VINX) | 88 | 2,21% | 2,01% | 0,60% | 14,24% | 12,09% | 33,36% |
| Svíþjóð (OMXS30) | 1016 | 2,82% | 4,31% | 0,90% | 7,43% | 7,95% | 28,47% |
| Noregur (OBX) | 323 | 1,91% | -0,01% | -2,22% | -1,29% | -2,86% | 19,11% |
| Finnland (OMXH25) | 2173 | 3,03% | 3,49% | -1,74% | 12,05% | 8,22% | 30,35% |
| Danmörk (OMXC20) | 402 | 1,27% | 1,27% | 9,84% | 23,46% | 21,47% | 34,69% |
(Verðbreyting í viðkomandi mynt, Bloomberg, 14. júní 2010)
Krónan
Krónan gaf lítillega eftir í liðinni
viku og hækkaði gengisvísitalan um 0,32% og endaði í 213,95 stigum samkvæmt
opinberu viðmiðunargengi Seðlabanka Íslands. Í vikunni var tilkynnt um tvíhliða
gjaldmiðlaskiptasamning upp á 66 ma. króna á milli Seðlabanka Íslands og
Seðlabanka Kína.
Samningurinn mun annars
vegar auðvelda viðskipti milli landanna, því ekki mun þurfa að nota aðra
gjaldmiðla í þeim og hins vegar getur Seðlabanki Íslands keypt júan fyrir
krónur, sem aftur ætti að vera hægt að skipta í evrur eða dollara.
Samningurinn
eykur því aðgengi seðlabankans að erlendu fé. Áhrif þessa samnings eru jákvæð
fyrir íslenskt hagkerfi en munu ekki hafa teljandi áhrif á krónuna.
Því skal þó haldið til
haga að þetta er annað skrefið í rétta átt hjá Seðlabanka Íslands á skömmum
tíma, en nýverið eignaðist bankinn íslensk ríkistryggð skuldabréf sem voru í
höndum erlends aðila og í raun ígildi „krónubréfa“. Á heildina litið er
Seðlabanki Íslands á réttri leið og gaman verður að sjá næstu vikur hvort
seðlabankinn hafi fleiri tromp á hendi.
| Vísitala | Lokagildi | Vika | 1 mán | 3 mán | 6 mán | Frá áram. | 12 mán |
| GVT ISK | 213,9 | 0,32% | -2,32% | -4,61% | -8,97% | -8,10% | -5,76% |
Fyrirvari
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.
