Nýr þriggja milljarða framtakssjóður

Íslensk verðbréf hafa lokið fyrsta áfanga í fjármögnun á nýjum framtakssjóði sem ber heitið TFII slhf.    Hluthafar eru lífeyrissjóðir og aðrir fagfjárfestar, alls 18 talsins. Sjóðurinn mun fjárfesta í eignarhlutum í félögum með trausta rekstrarsögu og taka virkan þátt í uppbyggingu og virðisaukningu þeirra.  TFII mun meðal annars horfa til fjárfestingatækifæra á landsbyggðunum.  Stefnt er að því að ljúka síðari hluta fjármögnunar sjóðsins fyrir árslok og að stærð hans verði þá 5 milljarðar króna.

 Við hjá Íslenskum verðbréfum erum þakklát fyrir það traust sem viðskiptavinir okkar sýna með þátttöku í TFII.  Undir þessu trausti munum við standa með markvissum fjárfestingum í íslensku atvinnulífi á næstu árum, þar sem landsbyggðirnar munu fá sérstaka athygli“, segir Jón Steindór Árnason annar framkvæmdstjóra TFII.

Jón Steindór hefur á undanförnum árum m.a. stýrt fjárfestingafélaginu Tækifæri hf. með góðum árangri, en Tækifæri hf. er fjárfestingarfélag sem fjárfestir í nýsköpun á Norðurlandi.

Byggja á 30 ára reynslu á fjármálamarkaði
Íslensk verðbréf voru stofnuð árið 1987 og fagna því 30 ára afmæli á þessu ári. Hlutverk félagsins er að aðstoða fagfjárfesta, stéttarfélög, sveitarfélög, fyrirtæki og einstaklinga við að ná hámarksávöxtun á fé sitt að teknu tilliti til áhættu.  Það gerir félagið með eignastýringu, miðlun, sérhæfðum fjárfestingum og vönduðu framboði sjóða. Félagið var í árslok 2016 með tæpa 130 milljarða kr. í virkri stýringu fyrir viðskiptavini sína. Aðalskrifstofur félagsins eru á Akureyri en félagið hefur einnig starfstöð í Reykjavík.

Framkvæmdastjóri Íslenskra verðbréfa og annar framkvæmdastjóra TFII er Sigþór Jónsson. Sigþór hefur á undanförnum árum komið að uppbyggingu og rekstri ýmissa framtakssjóða og verkefna, meðal annars í störfum sínum hjá Stefni og Landsbréfum.

Nánari upplýsingar um TFII