Íslensk verðbréf hafa milligöngu um sölu á byggingalausnafyrirtækinu Hýsi

Þorvaldur Guðjónsson, framkvæmdastjóri Hýsi-Merkúr, Jón Steingrímsson, stjórnarformaður Iðnvéla og I…
Þorvaldur Guðjónsson, framkvæmdastjóri Hýsi-Merkúr, Jón Steingrímsson, stjórnarformaður Iðnvéla og Innvals og Skafti Harðarson, framkvæmdastjóri Innvals.

Hýsi-Merkúr ehf. hefur, fyrir milligöngu Íslenskra Verðbréfa, undirritað samninga um sölu á byggingahluta félagsins sem rekinn hefur verið undir nafninu Hýsi undanfarin 15 ár.  Kaupendur eru eigendur og stjórnendur Iðnvéla ehf. og Innvals ehf. 

Hýsi hefur um árabil flutt inn og selt húseiningar frá Trimo, bogahýsi, gámahýsi, CLT og límtrésbyggingar, stálgrindarhús, öryggisgirðingar og fleira.  Mannvirki frá Hýsi skipta nú hundruðum, víðsvegar um landið.

Nýir eigendur tóku við rekstrinum nú um áramótin og hyggjast byggja enn frekar ofan á þann góða rekstur og orðspor sem Hýsi hefur skapað sér á Íslandi.   Nýja félagið mun starfa undir nafninu Hýsi ehf. og skrifstofa þess verður að Smiðjuvegi 44-46, Kópavogi.

Salan er liður í endurskipulagningu Hýsi-Merkúr ehf. sem hyggst einbeita sér að kjarnastarfsemi fyrirtækissins. En Hýsi-Merkúr hf er umboðs- og þjónustuaðili Liebherr á Íslandi fyrir byggingarkrana, bílkrana, beltakrana, hjóla- og beltagröfur, hjóla- og beltaskóflur, ýtur, skotbómulyftara, búkollur, steypudælubíla, færanlegar og fastar steypustöðvar og hafnarkrana.

Ráðgjöf og umjón með sölunni var, sem áður segir, í höndum fyrirtækjaráðgjafar Íslenskra Verðbréfa hf.

 

Björgvin Gestsson og Guðni Halldórsson í ÍV fyrirtækjaráðgjöf sem er staðsett í Hlíðarsmára 6, Kópavogi