Íslensk verðbréf kaupa Viðskiptahúsið

Íslensk verðbréf hf. hafa undirritað samning um kaup á Viðskiptahúsinu ehf. Kaupsamningurinn var gerður í kjölfar áreiðanleikakannana sem nú er lokið og er hann með fyrirvara um samþykki eftirlitsaðila og hluthafafundar Íslenskra verðbréfa sem haldinn verður 20. desember nk. Kaupin ná til allra félaga innan samstæðu Viðskiptahússins sem sinna ráðgjöf og þjónustu, einkum í sjávarútvegi og tengdum greinum.

Markmiðið með kaupunum er að skapa sérhæft fjármálafyrirtæki í eignastýringu, miðlun og ráðgjöf með sérstöðu í staðsetningu utan höfuðborgarsvæðisins og atvinnulífssérhæfingu. Kaupin hafa í för með sér augljósan ávinning fyrir starfsmenn, hluthafa og viðskiptavini.

Sigurður Atli Jónsson stjórnarformaður Íslenskra verðbréfa:
„Íslensk verðbréf og Viðskiptahúsið eru hér að taka fyrsta skrefið að nýju sérhæfðu fjármálafyrirtæki sem byggir á sameiginlegum grunni félaganna í eignastýringu og atvinnulífssérhæfingu. Við munum vinna út frá sameiginlegri stefnu um að byggja upp markaðsdrifið fyrirtæki sem veitir afburðar þjónustu á sviði ávöxtunar og fjármögnunar með áherslu á langtímasambandi við viðskiptavini.“

Jóhann M. Ólafsson, forstjóri og stofnandi Viðskiptahússins:
„Í tæp 20 ár höfum við unnið í nánum tengslum við flest sjávarútvegsfyrirtæki á landinu og fundið mörgum hverjum ný tækifæri. Með sameiningu við Íslensk verðbréf gefst tækifæri til að nýta þekkingu og reynslu félaganna til að auka þjónustu okkar við viðskiptavini og fókus á að tengja saman atvinnulífið og fjárfesta með því að byggja upp öflugt, sérhæft og óháð fjármálafyrirtæki með höfuðstöðvar á Akureyri.“

Um félögin
Íslensk verðbréf er sjálfstætt og sérhæft eignastýringafyrirtæki sem þjónað hefur einstaklingum og fagfjárfestum frá árinu 1987. Höfuðstöðvar félagsins eru á Akureyri og eru starfsmenn 18 talsins.

Viðskiptahúsið hefur frá árinu 1999 sérhæft sig í ráðgjöf til fyrirtækja í sjávarútvegi og tengdum greinum en félagið nýtur afburða sterkrar stöðu á því sviði.  Starfsstöð Viðskiptahússins er í Kópavogi og eru starfsmenn átta talsins.