Vikulegar markaðsfréttir Íslenskra verðbréfa
Innlend skuldabréf
Verðtryggð
skuldabréf hækkuðu mikið í vikunni – lengri bréfin um 2,66% og styttri um 1,47%.
Löng óverðtryggð bréf hækkuðu heldur minna eða um 0,76%. Ávöxtun vikunnar var því mjög góð.
Ástæða
mikillar hækkunar á verðtryggðum bréfum síðustu vikurnar er m.a. væntar
gjaldskrárhækkanir Orkuveitu Reykjavíkur. Telja má líklegt að önnur
orkufyrirtæki hækki gjaldskrár sínar í kjölfarið.
Í kjölfar hærra raforkuverðs er ljóst að
fyrirtæki sem reiða sig á rafmagn þurfa að hækka verð á sínum vörum s.s. garðyrkjubændur
og bakarar. Því má búast við töluverðu
verðbólguskriði vegna þessa.
Seðlabankinn
lækkaði vexti um 100 punkta á síðasta vaxtaákvörðunardegi og voru allir
meðlimir peningastefnunefndar sammála um þessa lækkun. Búast má við að SÍ lækki
vexti aftur töluvert á næsta vaxtaákvörðunardegi sem verður 22. september n.k.
Rökin fyrir því eru m.a. að landsframleiðsla er að dragast saman en fyrri tölur Hagstofunnar gáfu til kynna að hún myndi aukast. Núverandi stefna í skattamálum og viðhorf til erlendra fjárfesta eru til þess fallin að ýta undir samdráttinn og því nauðsynlegt fyrir SÍ að draga enn frekar úr peningalegu aðhaldi.
Innlend hlutabréf
Það var lítið að gerast á hlutabréfamarkaðnum í vikunni. Færeysku bankarnir BankNordik og Eik Bank auk Marels lækkuðu í verði og nam lækkun OMXI6ISK vísitölunnar í heild 1,41%.
Heildarveltan var rúmar 242 milljónir, mest með Marel og Össur að venju.
| Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
| BNORDIK | 139,00 | -1,42% | -3,47% | -8,55% | -9,15% | 7,34% | 1,09% |
| FO-ATLA | 150,00 | 0,00% | 5,63% | -6,25% | -1,96% | -6,25% | -37,88% |
| FO-EIK | 72,00 | -5,88% | -14,29% | -8,86% | -7,10% | -10,00% | -16,28% |
| ICEAIR | 3,50 | 0,00% | 2,94% | 12,90% | 6,06% | -4,11% | -10,26% |
| MARL | 93,00 | -0,85% | 2,20% | 16,54% | 32,86% | 49,04% | 56,30% |
| OSSR | 206,00 | 0,24% | 4,83% | 9,57% | 22,99% | 33,33% | 60,31% |
| OMXI6ISK | 936,75 | -1,41% | 0,16% | 3,56% | 6,86% | 14,94% | 14,29% |
(Nasdaq OMX Nordic, 6. september 2010)
Erlend hlutabréf
Miklar hækkanir voru almennt á hlutabréfamörkuðum í síðustu viku. FTSE hlutabréfavísitalan í London hækkaði um 4,37%, Dax í Þýskalandi um 3,08%, Nasdaq í Bandaríkjunum um 4,40% og Nikkei í Japan um 1,37%. Rekja má hækkanir í vikunni til aukinnar framleiðslu í Bandaríkjunum og einnig eru merki um aukinn hagvöxt í Kína og Ástralíu.
Atvinnuleysi í Bandaríkjunum heldur áfram að aukast og
mælist nú 9,6%. Í ágúst töpuðust 54
þúsund störf og þar af tíu þúsund í einkageiranum en spár gerðu ráð fyrir að
120 þúsund störf myndu tapast í það heila.
Atvinnuleysi í Þýsklandi hélst óbreytt milli júlí og ágúst og mælist nú
7,6%, en almennt stóð atvinnuleysi í stað á evrusvæðinu á sama tíma. Þetta hafði góð áhrif á markaðinn en samt sem
áður telja menn að efnahagsbatinn verði hægur næstu mánuði.
Samanlagður hagvöxtur allra 27 Evrópuríkjanna var 1% á milli fyrsta og annars ársfjórðungs. Þetta er mesti vöxtur sem sést hefur á milli fjórðunga í þrjú ár. Á sama tímabili er hagvöxtur á evrusvæðinu meiri en í hinum stóru hagkerfum heimsins.
| Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
| Heimsvísitala (MSCI) | 1119,15 | 3,93% | -1,80% | 6,72% | -3,33% | -3,16% | 5,21% |
| Þýskaland (DAX) | 6134,62 | 3,08% | -1,71% | 3,60% | 4,69% | 3,28% | 14,27% |
| Bretland (FTSE) | 5428,15 | 4,37% | 2,17% | 6,28% | -2,71% | 0,65% | 12,29% |
| Frakkland (CAC) | 3672,20 | 4,88% | -0,91% | 6,56% | -5,84% | -6,46% | 2,32% |
| Bandaríkin (Dow Jones) | 10447,93 | 2,99% | -1,93% | 5,19% | -1,12% | 0,19% | 10,66% |
| Bandaríkin (Nasdaq) | 1870,31 | 4,40% | -1,71% | 2,09% | -0,97% | 0,54% | 14,18% |
| Bandaríkin (S&P 500) | 1104,51 | 3,80% | -1,53% | 3,72% | -3,00% | -0,95% | 8,67% |
| Japan (Nikkei) | 9114,13 | 1,37% | -3,53% | -6,06% | -10,30% | -11,81% | -8,70% |
| Samnorræn (VINX) | 91,91 | 4,46% | -0,25% | 6,80% | 5,36% | 15,47% | 25,55% |
| Svíþjóð (OMXS30) | 1047,99 | 2,86% | -1,25% | 6,42% | 5,39% | 10,52% | 18,00% |
| Noregur (OBX) | 338,06 | 5,51% | -1,00% | 7,08% | 1,18% | 0,10% | 25,12% |
| Finnland (OMXH25) | 2289,43 | 4,25% | 0,35% | 9,21% | 6,09% | 13,33% | 23,30% |
| Danmörk (OMXC20) | 408,29 | 3,77% | -2,50% | 2,97% | 10,21% | 21,47% | 24,63% |
(Verðbreyting í viðkomandi mynt, Bloomberg, 6. september 2010)
Krónan
Krónan styrktist í liðinni viku og lækkaði gengisvísitalan um
0,94% og endaði í 206,06 stigum. Þegar líða tók á vikuna varð styrkingin
þónokkur. Eflaust spilar innflæði vegna
ferðamanna stórt hlutverk, en gjalddagar kreditkorta vegna júlí/ágúst mánaðar
voru í byrjun mánaðarins.
Seðlabankinn hefur hafið kaup á gjaldeyri og hafði það
léttvæg áhrif á gengi krónunnar, enda vilji bankans að svo verði. Leiða má líkur að því að Seðlabankinn kunni að
sporna við frekari styrkingu krónunnar. Ástæðan er sú að með sterkari krónu
veikist samkeppnisstaða innlendra atvinnuvega sem myndi draga úr afgangi af
vöru- og þjónustuviðskiptum.
Það eitt og
sér hefði síðan áhrif á hagvöxt til lækkunar. Á móti kemur að skuldsetning einkageirans er
mikil í erlendri mynt og eru tekjur litlar eða engar í erlendri mynt. Skuldastaðan kann þó að breytast til batnaðar
því algengar myntir í erlendum lánum eru japanskt jen og svissneskur franki.
Þær myntir eru mjög sterkar á móti öðrum helstu myntum og líklegt að þær gefi eftir seinni hluta ársins. Einnig gæti staða þessara aðila breyst verulega þegar Hæstiréttur hefur dæmt um vexti gengistryggðu lánanna. Það fer þó eftir því hversu víðtækur dómurinn verður, þ.e. hversu mikið fordæmisgildi hann hefur.
| Vísitala | Lokagildi | Vika | 1 mán | 3 mán | 6 mán | Frá áram. | 12 mán |
| GVT ISK | 206,06 | -0,94% | -2,06% | -3,55% | -10,03% | -11,49% | -11,92% |
Fyrirvari
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.