Vikulegar markaðsfréttir Íslenskra verðbréfa
Vikulega birta Íslensk verðbréf samantekt um þróun helstu eignaflokka undanfarna viku. Smelltu hér ef þú vilt skrá þig á listann.
Innlend skuldabréf
Löng verðtryggð skuldabréf lækkuðu um 0,28% og millilöng verðtryggð skuldabréf lækkuðu líka um 0,28%. Löng óverðtryggð skuldabréf lækkuðu um 0,22% og millilöng óverðtryggð skuldabréf lækkuðu um 0,35%.
Lánamál ríkisins héldu útboð á ríkisvíxlum fimmtudaginn 12. júlí, í boði voru RIKV 12 1015 og RIKV 13 0115. Í RIKV 12 1015 var tilboðum tekið fyrir 4.200 m.kr. að nafnverði á 3,29% flötum vöxtum og í RIKV 13 0115 var tilboðum tekið fyrir 7.700 m.kr. að nafnverði á 3,50% flötum vöxtum.
Innlend hlutabréf
OMXI6ISK vísitalan lækkaði í vikunni um 0,88%. Eina félagið sem hækkaði var Össur, um 0,72%. Mest lækkuðu bréf Marels, um 1,9%.
Heildarvelta á OMXI6ISK var rúmar 533 milljónir króna. Mest voru viðskipti með bréf fasteignafélagsins Regins og Marels. En þessi félög ásamt Icelandair voru með ríflega 89% af veltu vikunnar.
Fjarskiptafyrirtækið Vodafone hefur samið við fyrirtækjaráðgjöf Íslandsbanka vegna væntanlegrar skráningar fyrirtækisins í kauphöllina. Stefnt er að skráningu á þessu ári.
Í tengslum við fyrirhugaða skráningu er gert ráð fyrir að fram fari almennt hlutafjárútboð þar sem fjárfestum og almenningi gefst kostur á að skrá sig fyrir hlutum í félaginu. Þá mun Íslandsbanki einnig sjá um sölu á þeim bréfum Framtakssjóðs Íslands sem seld verða í útboðinu, sjóðurinn á stærstan hlut í Vodafone.
Eimskip er annað félag sem er á leið á markað seinna á þessu ári. Í vikunni keypti Lífeyrissjóður verslunarmanna 14% hlut í félaginu af Landsbankanum og bandaríska fjárfestingarfélaginu Yucaipa en þetta eru stærstu hluthafar í Eimskip. Hvort um sig seldi 7% hlut sem eru 14 milljónir að nafnverði.
| Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
| BNORDIK | 70,00 | 0,00% | -6,67% | -9,09% | -11,39% | -13,58% | -40,68% |
| HAGA | 18,10 | -0,55% | 0,00% | -3,47% | 5,85% | 10,70% | 13,48% |
| ICEAIR | 6,73 | -1,46% | 2,12% | 4,67% | 33,27% | 33,80% | 33,27% |
| MARL | 154,50 | -1,90% | -0,32% | 6,19% | 16,60% | 23,11% | 20,70% |
| OSSRu | 211,00 | 0,72% | 0,48% | 3,43% | 6,57% | 14,05% | 4,46% |
| Reginn | 211,00 | -0,24% | 0,00% | 0,00% | 0,00% | 3,05% | 3,05% |
| OMXI6ISK | 1057,54 | -0,88% | -0,13% | 2,14% | 11,31% | 16,26% | 6,40% |
(Verðbreyting í viðkomandi mynt, Nasdaq OMX Nordic, 16. júlí 2012)
Erlend hlutabréf
DAX í Þýskalandi hækkaði um 2,29% í vikunni og CAC í Frakklandi um 0,38%. S&P 500 vísitalan í Bandaríkjunum hækkaði um 0,16% en Nikkei í Japan lækkaði um 3,29% og heimsvísitalan MSCI lækkaði um 0,31%.
Fréttir af 7,6% hagvexti í Kína á öðrum ársfjórðungi fóru vel í fjárfesta og hækkuðu hlutabréfamarkaðir nokkuð í kjölfarið. Þrátt fyrir að hagvöxtur hafi minnkað milli fjórðunga þá var hann í takt við spár og búast menn við að stjórnvöld komi til með að örva efnahagslífið með peningalegum aðgerðum til að viðhalda hagvextinum.
Hlutabréf í Bandaríkjunum hækkuðu á föstudaginn eftir að hafa lækkað sex daga í röð. Ástæðan var meðal annars betra uppgjör JP Morgan en reiknað var með. Fjögur af sex félögum, í S&P 500 vísitölunni, sem birtu uppgjör í vikunni voru yfir spám greiningaraðila samkvæmt Bloomberg fréttaveitunni.
| Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
| Heimsvísitala (MSCI) | 1225,55 | -0,31% | 1,41% | -3,27% | 1,92% | 3,63% | -6,67% |
| Þýskaland (DAX) | 6557,10 | 2,29% | 5,25% | -1,03% | 5,41% | 11,16% | -9,19% |
| Bretland (FTSE) | 5666,13 | 0,06% | 3,28% | -0,13% | 0,02% | 1,55% | -3,17% |
| Frakkland (CAC) | 3180,81 | 0,38% | 2,87% | -0,90% | -1,51% | 0,52% | -14,77% |
| Bandaríkin (Dow Jones) | 12777,09 | 0,04% | 0,08% | -1,12% | 2,86% | 4,58% | 2,38% |
| Bandaríkin (Nasdaq) | 2908,47 | -0,98% | 1,24% | -2,67% | 7,30% | 11,64% | 4,25% |
| Bandaríkin (S&P 500) | 1356,78 | 0,16% | 1,04% | -0,93% | 5,25% | 7,89% | 3,09% |
| Japan (Nikkei) | 8724,12 | -3,29% | 1,81% | -7,88% | 4,13% | 3,18% | -12,54% |
| Samnorræn (VINX) | 93,75 | 1,02% | 6,95% | -0,79% | 2,97% | 7,21% | -1,96% |
| Svíþjóð (OMXS30) | 1030,94 | 0,69% | 5,90% | -0,12% | 2,14% | 4,79% | -4,12% |
| Noregur (OBX) | 384,93 | 2,65% | 6,38% | 0,46% | 4,88% | 7,37% | 0,10% |
| Finnland (HEX25) | 1892,50 | 0,46% | 3,67% | -6,30% | -7,45% | -2,42% | -16,37% |
| Danmörk (KFX) | 461,10 | 0,20% | 7,51% | 1,66% | 14,32% | 18,88% | 7,18% |
(Verðbreyting í viðkomandi mynt, Bloomberg, 16. júlí 2012)
Krónan
Gengisvísitala krónunnar lækkaði um 0,08% í vikunni og endaði í 220,05 stigum. Krónan veiktist um 0,84% gagnvart Bandaríkjadal en styrktist um 0,56% gagnvart evru.
Áframhald er á örri lækkun atvinnuleysis á Íslandi. Skráð atvinnuleysi í júní 2012 var 4,8% og lækkaði um 0,8 prósentustig frá því í maí. Í júní 2011 var skráð atvinnuleysi 6,7% og hefur því lækkað um 1,9 prósentustig á síðustu 12 mánuðum. Talsverðrar árstíðarsveiflu gætir í íslenskum atvinnuleysistölum og er atvinnuleysi jafnan minna yfir sumarmánuðina.
| Vísitala | Lokagildi | Vika | 1 mán | 3 mán | 6 mán | Frá áram. | 12 mán |
| GVT ISK | 220,05 | -0,08% | -1,76% | -3,95% | 0,40% | 1,27% | -0,37% |
(Gengisvísitala krónunnar, Seðlabankinn, 16. júlí 2012)
Fyrirvari
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Sveinn Torfi Pálsson, forstöðumaður eignastýringar.