Vikulegar markaðsfréttir Íslenskra verðbréfa
Vikulega birta Íslensk verðbréf samantekt um þróun helstu eignaflokka undanfarna viku. Smelltu hér ef þú vilt skrá þig á listann.
Innlend skuldabréf
Löng verðtryggð skuldabréf lækkuðu í vikunni sem leið um 1,07% en millilöng verðtryggð skuldabréf lækkuðu um 0,76%. Löng óverðtryggð skuldabréf lækkuðu um 1,14% en millilöng óverðtryggð skuldabréf lækkuðu um 0,56%.
Öll ríkistryggð skuldabréf lækkuðu í síðastliðinni viku og skýrist það af fréttum um slæma stöðu Íbúðalánasjóðs og mikillar óvissu um hvernig brugðist verður við vandanum. Í umræðunni hefur verið að breyta þurfi skilmálum íbúðabréfa þannig að sjóðurinn geti greitt þau upp hraðar til að mæta auknum uppgreiðslum á útlánum hans. Slíkar breytingar eru hins vegar háðar samþykki eigenda bréfanna og nokkuð ljóst að enginn samþykkir slíkar breytingar ótilneyddur.
Engu að síður hafa lætin í kringum þetta mál í síðustu viku haft slæm áhrif á markaðinn og til að mynda hafa verðbilin, munur á milli kaup- og sölutilboða, aukist verulega sem hefur neikvæð áhrif á viðskipti með bréfin.
Innlend hlutabréf
OMXI6ISK vísitalan hækkaði í síðustu viku um 1,01%. Mest hækkuðu bréf BankNordik, um 7,20%. Bréf Icelandair lækkuðu mest, um 1,91%.
Heildarvelta á OMXI6ISK var um 1,4 milljarðar króna. Mest voru viðskipti með bréf Icelandair fyrir ríflega 680 milljónir króna.
Fyrsta uppgjör Eimskips frá skráningu á markað var í takt við væntingar markaðarins. Hagnaður félagsins var 13,7 milljónir evra (2.250 milljónir króna) á fyrstu 9 mánuðum ársins.
Flutningsmagn í áætlanaflutningum félagsins á Norður-Atlantshafi jókst um 6,3% fyrstu níu mánuði ársins miða við sama tíma í fyrra.
Aftur á móti dróst saman magn í frystiflutningsmiðlun á þriðja ársfjórðungi um 12,7% frá saman tíma í fyrra sem endurspeglast í þróun markaða í Asíu. Þó svo magnið sé minna þá hefur framlegðin í frystiflutningsmiðlun ekki lækkað að sama skapi.
Fasteignafélagið Reginn hf. skilaði einnig uppgjöri í vikunni. Hagnaður félagsins fyrstu 9 mánuði ársins var 1,3 milljarðar króna. Afkoma félagsins er í takt við áætlun félagsins fyrir þetta ár.
| Félög/vísitala | Lokagildi | Vika | 1 mán | 3 mán | 6 mán | Frá áram. | 12 mán |
| BNORDIK | 67,00 | 7,20% | 9,84% | -1,47% | -10,67% | -17,28% | -10,67% |
| HAGA | 21,65 | 1,64% | 2,12% | 20,28% | 17,34% | 32,42% | 35,74% |
| ICEAIR | 7,70 | -1,91% | 3,91% | 7,99% | 17,38% | 53,08% | 57,14% |
| MARL | 132,50 | 0,00% | 3,11% | -4,33% | -15,06% | 5,58% | 11,81% |
| OSSRu | 184,50 | 1,93% | -1,86% | -7,29% | -11,30% | -0,27% | -1,07% |
| Reginn | 10,95 | 1,39% | 8,96% | 28,82% | 0,00% | 33,54% | 33,54% |
| OMXI6ISK | 1003,02 | 1,01% | 2,38% | 0,87% | -5,87% | 10,26% | 13,14% |
(Verðbreyting í viðkomandi mynt, Nasdaq OMX Nordic, 03. des. 2012)
Erlend hlutabréf
Nokkur hækkun var á erlendum hlutabréfum í liðinni viku. Heimsvísitalan MSCI hækkaði um 0,82%, DAX í Þýskalandi um 1,32%, S&P 500 í Bandaríkjunum um 0,50% og Nikkei í Japan um 0,85%.
Allar erlendar viðmiðunarvísitölur sem við styðjumst við hækkuðu í nóvember fyrir utan Dow Jones í Bandaríkjunum sem lækkaði um 0,54%. Mest hækkaði Nikkei í Japan um 5,79%.
S&P 500 hlutabréfavísitalan hækkaði um 0,28% í nóvember eftir að hafa lækkað um 1,98% í október og er ástæðan meðal annars vegna betri uppgjöra en spár greiningaraðila sögðu til um. Samkvæmt Bloomberg fréttaveitunni skiluðu 72% fyrirtækja, sem mynda S&P 500 vísitöluna, meiri hagnaði en spár gerðu ráð fyrir á þriðja ársfjórðungi.
Atvinnuleysi í Evrópu hækkaði um 0,1% í október og mælist nú 11,7% sem er hæsta gildi sem mælst hefur á evrusvæðinu. Frá árinu 1995 hefur atvinnuleysi verið að meðaltali 9,24% en lægst mældist það 7,2% í febrúar 2008.
| Vísitölur | Lokagildi | Vika | 1 mán | 3 mán | 6 mán | Frá áram. | 12 mán |
| Heimsvísitala (MSCI) | 1315,49 | 0,82% | 1,07% | 2,71% | 14,10% | 11,24% | 10,77% |
| Þýskaland (DAX) | 7405,50 | 1,32% | 2,00% | 5,78% | 22,65% | 25,81% | 22,04% |
| Bretland (FTSE) | 5866,82 | 0,82% | 1,45% | 2,11% | 11,79% | 5,53% | 5,91% |
| Frakkland (CAC) | 3557,28 | 0,81% | 3,73% | 3,22% | 20,82% | 12,82% | 12,64% |
| Bandaríkin (Dow Jones) | 13025,58 | 0,12% | -0,54% | -0,50% | 7,48% | 6,61% | 8,37% |
| Bandaríkin (Nasdaq) | 3010,24 | 1,46% | 1,11% | -1,85% | 9,56% | 15,55% | 14,59% |
| Bandaríkin (S&P 500) | 1416,18 | 0,50% | 0,28% | 0,68% | 10,81% | 12,61% | 13,82% |
| Japan (Nikkei) | 9446,01 | 0,85% | 5,79% | 7,68% | 12,06% | 11,86% | 9,42% |
| Samnorræn (VINX) | 100,64 | 0,21% | 2,38% | 1,95% | 18,68% | 15,25% | 17,12% |
| Svíþjóð (OMXS30) | 1085,85 | 1,31% | 3,21% | 3,86% | 13,94% | 10,34% | 11,86% |
| Noregur (OBX) | 411,12 | -0,56% | 0,12% | 0,71% | 18,47% | 14,96% | 16,77% |
| Finnland (OMXH25) | 2145,59 | -0,47% | 4,04% | 6,38% | 20,46% | 10,78% | 8,97% |
| Danmörk (OMXC20) | 490,93 | 0,13% | 1,16% | -0,29% | 17,42% | 26,37% | 28,72% |
(Verðbreyting í viðkomandi mynt, Nasdaq OMX Nordic, 03. des 2012)
Krónan
Tiltölulega litlar breytingar voru á gengi krónunnar í síðustu viku. Gengisvísitalan hækkaði um 0,16% og endaði í 224,62 stigum. Krónan styrktist um 0,44% gagnvart dollara en veiktist um 0,43% gagnvart evru.
Í októbermánuði voru fluttar út vörur fyrir 63,3 milljarða króna en vörur fluttar inn fyrir 48 milljarða og voru vöruskiptin því hagstæð um rúma 15 milljarða . Til samanburðar voru vöruskiptin hagstæð um 8,3 milljarða á sama gengi í október 2011.
Sé litið á fyrstu tíu mánuði ársins minnkar afgangur á vöruskiptum aftur á móti á milli ára, var 65,1 milljarður í ár samanborið við 90,7 milljarðar á sama tímabili í fyrra.
| Vísitala | Lokagildi | Vika | 1 mán | 3 mán | 6 mán | Frá áram. | 12 mán |
| GVT ISK | 224,62 | 0,16% | -1,13% | 5,12% | -0,19% | 3,38% | 3,93% |
(Gengisvísitala krónunnar, Seðlabankinn, 03. des 2012)
Fyrirvari
Markaðsfréttir Íslenskra verðbréfa eru unnar af starfsmönnum Íslenskra verðbréfa hf. Þær eru stutt samantekt og ber ekki að líta svo á að í þeim sé að finna allar tiltækar upplýsingar um þau viðfangsefni sem til umfjöllunar eru.
Við vinnslu fréttanna er stuðst við innlendar og erlendar upplýsinga- og fréttaveitur sem taldar eru áreiðanlegar, en einnig við opinberar upplýsingar, eigin úrvinnslu og mat starfsmanna á hverjum tíma. Íslensk verðbréf hf. ábyrgjast þó ekki nákvæmni upplýsinganna, áreiðanleika eða réttmæti þeirra.
Markaðsfréttirnar eru einungis birtar í upplýsingaskyni og skal því ekki litið á þær sem ráðleggingu/ráðgjöf um að ráðast eða ráðast ekki í tiltekna fjárfestingu eða tilboð um að kaupa, selja eða skrá sig fyrir tilteknum fjármálagerningum.
Ábyrgðarmaður Vikulegra markaðsfrétta Íslenskra verðbréfa er Björn Snær Guðbrandsson, forstöðumaður eignastýringar.